چلاک قیدی

چلاک قیدی

ایک گاؤں میں ایک بابا جی رہتے تھ۔ ان کا بیٹا جیل میں قید تھا۔

ایک دن بابا جی کو بڑی فکر لگی، کیونکہ زمین میں کھدائی کا وقت آ گیا تھا، اور بیج بونا تھا، لیکن گھر میں کوئی مرد نہیں تھا جو کھدائی کرے۔

بابا جی نے سوچا، چلو بیٹے کو خط لکھتا ہوں۔

بابا جی نے خط لکھا:

_”میرے پیارے بیٹے،_
_السلام علیکم!_
_بیٹا، تم تو جیل میں ہو، یہاں زمین کی کھدائی کا وقت آ گیا ہے۔ مجھ سے اکیلے سے کھدائی نہیں ہوتی، میری کمر میں درد ہے۔ بیج بھی بونا ہے۔ کوئی جگاڑ لگاؤ، کوئی حل بتاؤ، میں کیا کروں؟_
_تمہارا باپ”_

اب جیل میں سارے خط پہلے پولیس والے پڑھتے تھے، پھر آگے بھیجتے تھے۔

بیٹے نے باپ کا خط پڑھا، اسے سمجھ آ گیا کہ پولیس بھی یہ خط پڑھے گی۔ اس نے مسکرا کر جواب لکھا:

_”ابا جان، السلام علیکم!_
_ابا، خبردار! زمین میں بالکل کھدائی مت کرنا!_
_زمین میں ہم نے ہتھیار چھپا کر رکھے ہیں، بندوقیں، گولیاں سب وہیں دفن ہیں۔ اگر تم نے کھدائی کی تو پولیس کو پتہ چل جائے گا، اور میں پھنس جاؤں گا۔_
_ان ہتھیاروں کا خیال کرنا، ان کو ہاتھ بھی مت لگانا!_
_تمہارا بیٹا،”_

اب جیسا کہ قیدی نے سوچا تھا، پولیس والے نے پہلے یہ خط پڑھ لیا۔

پولیس والا بھاگا بھاگا اپنے افسر کے پاس گیا اور بولا:
“سر! سر! بڑا مال ہاتھ لگا ہے! بیٹے نے اپنے باپ کو خط میں لکھا ہے کہ زمین میں ہتھیار چھپائے ہیں!”

افسر بولا: “اوئے! جلدی ٹیم تیار کرو! پوری زمین کھود ڈالو!”

اگلے دن صبح صبح، 20 پولیس والے، بڑے بڑے بیلچے لے کر  کھیت میں پہنچ گئے۔

بابا جی حیران ہو کر دیکھ رہے تھے کہ یہ کیا ہو رہا ہے؟

پولیس والوں نے ساری زمین کھود ڈالی۔ آگے سے پیچھے تک، دائیں سے بائیں تک، ایک ایک انچ کھود دیا۔ لیکن انہیں کوئی ہتھیار نہیں ملا۔ نہ بندوق ملی، نہ گولی ملی۔

شام تک تھک ہار کر پولیس والے واپس چلے گئے۔

جب بیٹے نے *دوسرا خط* اپنے ابا کو لکھا تو اس کو بھی پہلے پولیس والوں نے ہی پڑھا۔

بیٹے نے دوسرے خط میں لکھا تھا:

> “ابا جان، السلام علیکم!
>
> ابا، میں جیل میں بیٹھ کر بس اتنا ہی کر سکتا تھا کہ آپ کے کھیت کی کھدائی کروا دی۔
>
> پولیس والوں نے پورا کھیت کھود دیا ہے، اب آپ بس بیج بو دیں۔
>
> تمہارا بیٹا، “

پولیس والے نے جب یہ دوسرا خط پڑھا تو اس کا منہ کھلا کا کھلا رہ گیا۔

اس نے افسر سے کہا: “سر، ہم تو بے وقوف بن گئے! اس نے تو ہم سے مفت میں کھدائی کروا لی!”

اور ادھر بابا جی خط پڑھ کر ہنس ہنس کر بولے:
“میرا بیٹا جیل میں بھی ہو کر میرا کھیت کھدوا گیا!” 😂

Leave a Reply

NZ's Corner