مینیجر کی ایمانداری 😅

مینیجر کی ایمانداری 😅



ایک دفعہ کا ذکر ہے کہ ایک صاحب کسی ہوٹل میں تشریف لائے۔ استقبالیہ پر پہنچ کر انہوں نے پوچھا کہ کمرہ نمبر 49 خالی ہے یا کسی کے نام بک ہو چکا ہے؟

اتفاق سے کمرہ خالی تھا، چنانچہ انہیں دے دیا گیا۔

ابھی کچھ ہی دیر گزری تھی کہ صاحب نے بیرا بلایا اور چند عجیب و غریب چیزوں کی فرمائش کر دی۔ ایک سیب چاہیے جس کا وزن ٹھیک 159 گرام ہو، ایک چھری جس کا دستہ سیاہ ہو، سوا دو میٹر سوتی کالا کپڑا اور پورے 69 میٹر کالا دھاگا۔

بیرا یہ فرمائش سن کر پہلے تو خود حیران ہوا، پھر مینیجر کے پاس جا پہنچا۔ مینیجر نے بھی کچھ دیر سوچا کہ آخر مہمان کو ان چیزوں سے کیا کام پڑ گیا ہے، مگر چونکہ ہوٹل میں مہمان کی فرمائش پوری کرنا ہی کاروباری اصول تھا، اس لیے تمام اشیا کمرے میں بھجوا دیں۔

مہمان نے سامان وصول کیا اور ساتھ ہی سختی سے ہدایت کر دی کہ رات بھر اسے کسی صورت ڈسٹرب نہ کیا جائے۔

رات گئے کمرہ نمبر 49 سے ایسی آوازیں آنا شروع ہوئیں جیسے اندر کوئی زبردست معرکہ برپا ہو۔ کبھی دھماکے جیسی آواز، کبھی کسی کے چیخنے کی آواز اور کبھی یوں محسوس ہوتا جیسے پورا کمرہ الٹ پلٹ ہو رہا ہو۔

مینیجر کئی مرتبہ کمرے کے دروازے تک گیا، مگر مہمان کی ہدایت یاد کر کے واپس آ جاتا۔

صبح ہوئی تو مہمان اپنا سامان اٹھائے ہوٹل سے روانہ ہو گیا۔ اس کے جاتے ہی مینیجر کی تجسس بھری طبیعت اسے کمرہ نمبر 49 میں لے گئی۔ اندر پہنچ کر دیکھا تو کمرہ بالکل صاف ستھرا تھا۔ میز پر سیب، چھری، کپڑا اور دھاگا اسی ترتیب سے رکھے تھے جس ترتیب سے رات کو بھجوائے گئے تھے۔ نہ کوئی چیز استعمال ہوئی تھی اور نہ کمرے میں کسی قسم کی توڑ پھوڑ کے آثار تھے۔

مینیجر نے سوچا کہ شاید یہ صاحب کسی خاص قسم کے تجربات کرتے ہیں۔

خیر، بات آئی گئی ہو گئی۔

ٹھیک ایک سال بعد وہی صاحب دوبارہ ہوٹل تشریف لے آئے۔ سب سے پہلے کمرہ نمبر 49 کی دستیابی معلوم کی۔ کمرہ خالی تھا، سو ان کے نام بک کر دیا گیا۔

اس مرتبہ بھی انہوں نے پچھلے سال والی تمام چیزیں اسی وزن، سائز اور مقدار کے ساتھ طلب کیں۔ مینیجر نے بغیر کچھ پوچھے سامان بھجوا دیا۔ صاحب نے پھر دروازے پر ’’No Disturb‘‘ کا بورڈ لگایا اور رات بھر کے لیے اندر بند ہو گئے۔

رات کو ایک بار پھر وہی تماشہ شروع ہو گیا۔ کبھی چیخ و پکار، کبھی دھماکے اور کبھی ایسی آوازیں کہ ہوٹل کے دوسرے مہمانوں نے بھی شکایت کر دی۔

صبح صاحب حسبِ معمول خاموشی سے ہوٹل سے رخصت ہونے لگے تو مینیجر سے رہا نہ گیا۔ اس نے ہمت کر کے پوچھ ہی لیا:

’’جناب! اگر برا نہ مانیں تو ایک بات پوچھوں؟ آپ ہر سال یہی کمرہ لیتے ہیں، یہی عجیب و غریب چیزیں منگواتے ہیں اور پھر رات بھر کمرے سے ایسی آوازیں آتی ہیں جیسے اندر کوئی جنگ لڑی جا رہی ہو۔ مگر صبح کمرہ بالکل ویسا ہی ملتا ہے۔ آخر آپ کرتے کیا ہیں؟‘‘

صاحب نے اسے گھورا اور قدرے روکھے لہجے میں جواب دیا:

’’بھائی، آپ ہوٹل چلاتے ہیں یا جاسوسی کا ادارہ؟ اپنا کام کیجیے اور مجھے جانے دیجیے۔‘‘

مینیجر خاموش ہو گیا۔

اگلے سال صاحب پھر آ گئے۔ کمرہ نمبر 49 لیا، وہی سامان منگوایا اور رات بھر حسبِ معمول وہی شور شرابا جاری رہا۔

اس مرتبہ مینیجر نے فیصلہ کر لیا کہ اب یہ راز معلوم کیے بغیر چین سے نہیں بیٹھے گا۔ صبح صاحب رخصت ہونے لگے تو مینیجر نے ان کا راستہ روک لیا اور ہاتھ جوڑ کر عرض کی:

’’جناب! تین سال سے میرا دماغ خراب کر رکھا ہے۔ خدا کے لیے بتا دیجیے کہ آخر آپ اس کمرے میں کرتے کیا ہیں؟ جب تک آپ نہیں بتائیں گے، میں آپ کو جانے نہیں دوں گا۔‘‘

مہمان نے جب دیکھا کہ مینیجر واقعی جان چھوڑنے والا نہیں تو کچھ دیر سوچنے کے بعد اسے اپنے قریب بلایا اور کہا:

’’دیکھو، میں تمہیں اپنا راز بتا دیتا ہوں، لیکن ایک شرط ہے۔ میری اجازت کے بغیر یہ بات کسی دوسرے شخص کو نہیں بتاؤ گے۔‘‘

مینیجر نے فوراً وعدہ کر لیا کہ وہ اس راز کو ہمیشہ اپنے سینے میں دفن رکھے گا۔

مہمان نے اطمینان ہونے پر اسے اپنا راز بتا دیا اور وہاں سے رخصت ہو گیا۔

ابھی مہمان ہوٹل سے باہر ہی نکلا تھا کہ پورا عملہ مینیجر کے گرد جمع ہو گیا۔ ہر کوئی ایک ہی سوال کر رہا تھا:

’’سر! آخر وہ صاحب کرتے کیا ہیں؟ ہمیں بھی تو بتائیں!‘‘

مینیجر نے سب کو خاموش کرایا اور بڑے اعتماد سے جواب دیا:

’’دیکھو بھئی! میں ایک اصول پسند اور ایماندار آدمی ہوں۔ میں نے اس مہمان سے وعدہ کیا ہے کہ اس کی اجازت کے بغیر کسی کو راز نہیں بتاؤں گا۔ لہٰذا آپ لوگ مجھ سے اس بارے میں کوئی امید نہ رکھیں۔‘‘

اب صورتِ حال یہ ہے کہ تین سال گزر چکے ہیں، وہ مہمان دوبارہ ہوٹل نہیں آیا، عملہ آج بھی اس راز کو جاننے کے لیے بے چین ہے اور مینیجر صاحب اپنی ایمانداری پر قائم ہیں۔

البتہ کبھی کبھی عملے کے سامنے یہ ضرور کہتے ہیں:

’’رزق تو اللہ دیتا ہے، مگر عزت کردار سے ملتی ہے۔ ہم نے آج تک کسی کا راز فاش نہیں کیا!‘‘

اور ادھر پورا عملہ سوچ رہا ہے کہ کاش وہ صاحب ایک مرتبہ پھر ہوٹل تشریف لے آئیں، تاکہ مینیجر صاحب کی ایمانداری کا کچھ تو فائدہ انہیں بھی پہنچے۔
#منقول
😝😝😝
نوٹ: کچھ کہانیوں کا کوئی سر پیر نہیں ہوتا۔ غالباً یہ بھی ایسی ہی تھی، بس تفریح کے لیے اپلوڈ کر دی کہ شاید آپ اندازہ لگا سکیں کہ یہ راز کیا تھا اور اسی بہانے مجھے بھی پتا چل جائے گا

Leave a Reply

NZ's Corner