ایک مصری شخص بیچ بازار بیٹھا قدیم حنوط شدہ لاش، یعنی ممی، فروخت کر رہا ہے۔
پڑھنے میں ناقابلِ یقین لگتا ہے نا؟ لیکن یہ 1865ء کی ایک تصویر ہے، جو اُس دور کی ذہنیت کی عکاسی کرتی ہے، جب یورپی اقوام خود کو کرۂ ارض کی سب سے برتر مخلوق اور تہذیب یافتہ انسان سمجھتی تھیں۔
مفتوحہ علاقوں کے باشندے ان کی نظر میں کمتر درجے کے انسان تھے اور ان ممالک کی تہذیب، تاریخ اور ثقافتی ورثے کی ان کے نزدیک کوئی خاص اہمیت نہیں تھی۔
برصغیر کے ساتھ تو انہوں نے جو کچھ کیا، سو کیا، مصر جیسے عظیم الشان تاریخی ورثے کے حامل ملک کو بھی اس بے دردی سے لوٹا کہ آج اس کے قیمتی آثار کا بڑا حصہ یورپی عجائب گھروں کی زینت بنا ہوا ہے۔
مصر سے ملنے والی ان حنوط شدہ لاشوں، یعنی ممیوں، کے ساتھ کیا سلوک کیا جاتا رہا؟ آئیے، ذرا ماضی کے ان شرم ناک واقعات پر نظر ڈالتے ہیں۔
یورپی باشندے اہرامِ مصر سے ممیاں خرید کر اپنے ساتھ لے جاتے اور پھر اپنے محلات میں باقاعدہ تقریبات منعقد کرتے۔ ان تقریبات کا ایک عجیب و غریب اختتام ہوتا: ممی کے جسم پر لپٹے کفن کو نوچ کر اتارا جاتا، پھر لاش کو جلا دیا جاتا اور اس کی راکھ کو مختلف فضول اور توہم پرستانہ مقاصد کے لیے استعمال کیا جاتا۔ یہاں تک کہ اس راکھ سے مردانہ طاقت بڑھانے کی نام نہاد ادویات بھی تیار کی جاتی تھیں۔
یہی ممیاں امریکہ بھی پہنچیں، جہاں ان کی باقیات کو کاغذ سازی سمیت مختلف صنعتی مقاصد کے لیے استعمال کیا گیا۔
حد تو یہ تھی کہ برطانوی دور میں بعض مقامات پر ان ممیوں کو بھاپ سے چلنے والے انجنوں میں ایندھن کے طور پر بھی استعمال کیے جانے کے واقعات بیان کیے جاتے ہیں۔
وقت گزرنے کے ساتھ صنعتی ترقی، علمی و تحقیقی سرگرمیوں اور آثارِ قدیمہ میں بڑھتی ہوئی دلچسپی نے ان تاریخی باقیات کی اہمیت اجاگر کی۔ تب کہیں جا کر ان کے تحفظ کی کوششیں شروع ہوئیں۔
اس کے باوجود بیسویں صدی کے وسط تک امریکہ اور یورپ کے بعض امرا بلیک مارکیٹ سے ممیاں خرید کر اپنے گھروں میں سجاوٹ اور نوادرات کے طور پر رکھتے تھے۔ المیہ یہ تھا کہ جو شخص پوری ممی خریدنے کی استطاعت نہیں رکھتا تھا، وہ اس کے جسم کا کوئی ایک حصہ خرید لیتا تھا، جن میں سر کو خاص اہمیت حاصل تھی۔
یہ بھی ایک تلخ حقیقت ہے کہ مصر کے بعض مقامی باشندے بھی اس لوٹ مار اور غیر قانونی خرید و فروخت میں شریک رہے۔ یوں وہ اپنے ہی تاریخی ورثے کو کوڑیوں کے بھاؤ مغربی خریداروں کے ہاتھوں فروخت کرتے رہے۔
آج دنیا جنیوا کنونشن سمیت متعدد بین الاقوامی معاہدوں کے ذریعے انسانی وقار، تاریخی ورثے اور تہذیبی شناخت کے تحفظ کی بات کرتی ہے۔ ان معاہدوں کو بھی کئی دہائیاں گزر چکی ہیں، لیکن اس کے باوجود مغرب کا ایک مخصوص طبقہ آج بھی ہمیں یہ باور کرانے کی کوشش کرتا ہے کہ ہم جاہل تھے، ہماری کوئی تاریخ اور تہذیب نہیں تھی، ہم صدیوں پرانے زمانے میں جی رہے تھے اور یہ مغرب ہی تھا جس نے ہمارے لیے شعور کے دروازے کھولے۔
تاریخ کا المیہ یہ ہے کہ جو قومیں دوسروں کے تہذیبی ورثے کو لوٹتی رہیں، وہی بعد میں انہیں تہذیب، شعور اور انسانیت کا درس دینے لگیں۔


