تین آدمی ایک ساتھ کسی سفر پر روانہ ہوئے۔ ان تینوں میں جو سب سے بڑا تھا اُس نے اپنے دونوں ساتھیوں سے پوچھا، “تم نے اپنا شہر کیوں چھوڑا اور سفر کی یہ مصیبت کیوں قبول کی ہے؟”
اُس نے جواب دیا، “میں جس گاؤں میں رہتا تھا، وہاں ایسے ایسے واقعات رونما ہوتے تھے جنہیں میں برداشت نہیں کر پاتا تھا اور حد سے جل اٹھتا تھا اور مسلسل جلتا رہتا تھا۔ میں نے خیال کیا کہ دو تین روز کے لیے اپنے وطن کو چھوڑ دوں، شاید اس طرح ان واقعات کو دیکھنے سے محفوظ رہوں جو مجھ سے نہیں دیکھے جاتے۔”
دوسرے نے کہا— “مجھے بھی یہی دکھ ستاتا تھا اور اسی لیے میں نے بھی اپنا وطن چھوڑ دیا۔”
تیسرے نے کہا— “تم دونوں میری ہی طرح ایک سا دکھ رکھتے ہو۔ میں بھی اسی جلن میں جنگل کی طرف نکلا تھا۔”
جب اُنہیں یہ معلوم ہوا کہ وہ سب ایک ہی غم کا شکار ہیں تو وہ ایک دوسرے سے بڑے خوش ہوئے۔ ایک روز راستے میں اُنہیں اشرفیوں سے بھرا ایک تھیلا ملا۔ تینوں ایک ساتھ اُسے اٹھانے کے لیے جھپکے اور کہنے لگے، “آؤ ہم مل کر ان اشرفیوں کو بانٹ لیں اور یہاں سے اپنے وطن کو لوٹ جائیں تاکہ آرام سے گزر بسر کر سکیں۔”
کوئی بھی شخص اس حد کے مارے اس پر راضی نہ ہوا کہ دوسروں کو اس میں حصہ کیوں مل رہا ہے۔ تینوں پریشان ہو کر وہیں بیٹھ گئے۔ نہ یہ ہمت تھی کہ اشرفیوں کے تھیلے کو وہیں چھوڑ دیں اور نہ یہ گوارا تھا کہ انہیں آپس میں تقسیم کر لیں۔ پورا ایک دن اور ایک رات بھوکے پیاسے آپس میں لڑتے رہے لیکن پھر بھی فیصلہ نہ کر سکے۔
دوسرے روز صبح صبح ایک بادشاہ شکار کی غرض سے اُس طرف نکل آیا اور اپنے چند ساتھیوں کے ساتھ اس جگہ پہنچا جہاں تینوں بیچ راستے میں بیٹھے ہوئے تھے۔ اُن سے اُس کی وجہ دریافت کی اور حال معلوم کیا۔
تینوں نے سچ سچ بات بتا دی کہ ہم تینوں بڑے حاسد ہیں، اور اسی وجہ سے اپنا وطن چھوڑ کر سفر پر روانہ ہوئے تھے۔ لیکن یہاں بھی وہی واقعہ پیش آیا۔ نوبت یہاں تک پہنچی۔ ہم ایک منصف کی تلاش میں ہیں جو ہمارے درمیان اشرفیوں کو تقسیم کر دے۔ شکر خدا کہ اب وہ موقع میسر ہوا اور آپ لوگ یہاں آئے ہیں۔
بادشاہ نے کہا— “تم تینوں میں، ہر شخص اپنے اپنے حسد کی صفت بیان کرے تاکہ میں اس حساب سے یہ اشرفیاں تم لوگوں میں تقسیم کر سکوں۔”
ایک نے کہا— “میرا حسد اس مرتبے پر پہنچ چکا ہے کہ میں یہ ہرگز نہیں چاہتا کہ کسی پر میں احسان یا شفقت کروں تاکہ وہ میرے اس احسان کی وجہ سے خوش حال ہو جائے!”
دوسرے نے کہا— “تم تو پھر بھی نیک ہو اور حسد ہرگز نہیں رکھتے۔ میرا حسد تو اس درجے کو پہنچ چکا ہے کہ میں یہ بھی نہیں دیکھ سکتا کہ کوئی کسی پر احسان یا شفقت کرے اور اپنے مال میں سے کسی کو کچھ دے!”
تیسرے شخص نے کہا— “تم دونوں اس معاملے میں بد نصیب اور تمہارا دعویٰ پشیمان اور بے بنیاد ہے۔ میں اس قدر حاسد ہوں کہ یہ بھی ہرگز گوارا نہیں کر سکتا کہ کوئی مجھ پر احسان اور شفقت کرے، یا میرے ساتھ نیکی کرے تاکہ اس نیکی کے بدلے اسے کچھ ملے۔”
بادشاہ نے تعجب سے دانتوں میں انگلی دبائی اور ان حاسدوں کے حسد پر حیران ہو کر کہا—
> “یہ اشرفیاں تم تینوں پر حرام ہیں اور ہر ایک کو اس کے گناہ کے مطابق سزا لازمی ہے۔ وہ جو دوسروں پر احسان نہیں کرنا چاہتا، اس کی سزا یہی ہے کہ وہ بھی اس دولت سے محروم رہے اور نقصان اٹھائے؛ اور وہ جو یہ بھی گوارا نہیں کر سکتا کہ کوئی کسی پر احسان کرے، اس کی سزا یہی ہے کہ اسے جلد از جلد زندگی کی قید سے آزاد کر دیا جائے، تاکہ وہ اس دکھ کو برداشت کرنے سے نجات پائے۔ اور وہ شخص جو اپنے آپ پر احسان کرنے والے سے بھی حسد رکھتا ہے اور اپنے حق میں بھی کسی کی نیکی برداشت نہیں کر سکتا، وہ اس سزا کا مستحق ہے کہ مختلف قسم کے عذابوں میں مبتلا ہو اور ایک مدت تک اسی میں گھرا رہے، یہاں تک کہ اس کی روح قفسِ عنصری سے پرواز کر جائے۔”
لہٰذا پہلے شخص کے لیے حکم دیا کہ اسے ننگے پاؤں، بے سروسامان اس جنگل میں چھوڑ دیا جائے اور اس کے پاس جو مال و متاع ہے، وہ سب چھین لیا جائے۔ دوسرے حاسد کو تیغ کرنے (قتل کرنے) کا حکم دیا اور تیسرے شخص کو ننگے بدن تیز دھوپ میں پھینکنے کا حکم دیا تاکہ روتے روتے ہلاک ہو جائے۔
اس طرح تینوں حاسد اپنے حسد کی وجہ سے اس انجام کو پہنچے۔
اخلاقی سبق:
حسد ایک ایسا جذبہ ہے جو انسان کی عقل پر پردہ ڈال دیتا ہے اور اُسے خود اپنے اور دوسروں کے فائدے سے محروم کر دیتا ہے۔ حسد کا انجام ہمیشہ تباہی اور رسوائی ہوتا ہے۔


